მამობა,როგორცლიდერობა!როგორ იქცევა მამა ოჯახში? როგორ ექცევა საკუთარ მეუღლეს? როგორ ართმევს თავს წინააღმდეგობებს?
Opinions expressed by Entrepreneur contributors are their own.
You're reading Entrepreneur Georgia, an international franchise of Entrepreneur Media.
ყველა მამას, რომელსაც მამობის პასუხისმგებლობა სათანადოდ გააზრებული აქვს, შვილების აღზრდა, უპირველესად, სწორი ცხოვრებისეული მაგალითის ჩვენებით მოეთხოვება.
შეძლებს თუ არა მამა საკუთარი შვილისთვის ნამდვილი როლური მოდელი, მისაბაძი და ავტორიტეტული ადამიანი გახდეს, ეს მხოლოდ მამის ქცევაზეა დამოკიდებული.
როგორ იქცევა მამა ოჯახში? როგორ ექცევა საკუთარ მეუღლეს? როგორ ართმევს თავს წინააღმდეგობებს? შეუძლია თუ არა სიმშვიდის შენარჩუნება კრიტიკულ სიტუაციებში? როგორ ეპყრობა განსხვავებულ, სუსტ ადამიანებს? როგორ სწავლობს დაშვებულ შეცდომებზე? როგორ უყურებს მარცხს?
ლიდერი, როგორც მსახური, ლიდერობის ყველაზე გამართლებული ფორმაა, რაც მამამ შესაძლოა აარჩიოს შვილებთან ურთიერთობისას, როცა გაცილებით მკაცრი და მომთხოვნი იქნება საკუთარი თავის მიმართ, პასუხისმგებლობას თავის თავზე აიღებს, შვილებს კი წაახალისებს, კარგი მაგალითის ჩვენებით ზრდასა და განვითარებაში დაეხმარება, მათშიც გააღვივებს ლიდერობას.
მამებს უნდა გვახსოვდეს, რომ, უპირველესად, ჩვენი, საკუთარი საქციელით ვზრდით ჩვენს შვილებს და თუ გვსურს, შვილების აღზრდის პროცესი ცხოვრების ბოლომდე გაგრძელდეს, დროს არ უნდა ჩამოვრჩეთ, მუდმივად უნდა განვვითარდეთ და გავჯანსაღდეთ როგორც ფიზიკურად, ისე სულიერად. ვიყოთ მეტად ინოვაციური, შემოქმედებითი, თანამედროვე, ინფორმირებული, რადგან სხვა შემთხვევაში ვეღარ შევძლებთ ჩვენი შვილებისთვის საუკეთესო მაგალითის ჩვენებას, შესაბამისად, ვეღარ შევძლებთ მათ აღზრდაში მონაწილეობას.
ისევე, როგორც ნამდვილი ლიდერი, ნაცვლად აკრძალვებისა, ძალდატანებისა და დამორჩილებისა, მამა საკუთარი შვილებისთვის ისეთი გარემოს შექმნაზე უნდა ფიქრობდეს, სადაც მათი ნიჭი და შესაძლებლობა ბოლომდე გამოვლინდება, გაიზრდება, განვითარდება და გაიფურჩქნება.
ზრდასა და განვითარებაზე ორიენტირებული მშვიდი გარემოს შექმნა მამის, ისევე, როგორც ყველა ლიდერის, მთავარი მოვალეობაა.
მამის, როგორც ლიდერის, უმთავრესი ფუნქციაა, შიშისა და უნდობლობის ნაცვლად, ხელშეწყობისა და ჰარმონიის, ნდობისა და გულწრფელობის პირობებში საკუთარი შვილების პოტენციალის სრულად რეალიზაციაზე, მათ მუდმივ ტრანსფორმაციაზე იზრუნოს.
მოტივაცია, ინსპირაცია, მხარდაჭერა, ბიძგი, გამხნევება, პოზიტიური ზემოქმედება, დამუხტვა ლიდერისთვის აუცილებელი თვისებებია და თუ მამასაც სურს, იყოს საკუთარი შვილის ნამდვილი ლიდერი, მაქსიმალურად უნდა შეეცადოს ისეთი გარემო შეუქმნას, სადაც არათუ უკვე გამოვლენილ ნიჭს, არამედ აქამდე უცნობ, დროებით მიძინებულ და ჩაკეტილ შესაძლებლობებსაც გაუხსნის ახალ გზას და პოტენციალის მაქსიმალურად რეალიზებაში დაეხმარება.
და მაინც, მამები ვზრდით შვილებს თუ ჩვენი შვილები გვზრდიან ჩვენ?
ამშეკითხვაზე პასუხის მისაღებად ყველა მამა უნდა დაფიქრდეს, რადგან ჩვენი შვილებისთვის ცხოვრების ბოლომდე მისაბაძი ადამიანები ვართ და არ გვაქვს ჩამორჩენისა და ერთ ადგილას გაჩერების უფლება.
ლიდერობა განვითარებაა. მამობა ლიდერობაა.
ამიტომაც, უნდა გვესმოდეს, რომ იმ მომენტიდან, როცა უარს ვიტყვით განვითარებაზე, უარს ვამბობთ ჩვენი შვილების აღზრდის გაგრძელებაზე, რადგან მათთვის ვეღარ ვიქნებით საუკეთესო და პროგრესული მაგალითის მიმცემი.
შესაძლოა, ავტორიტეტი არ დავკარგოთ და ჩვენი შვილები მაინც ძველებური პატივისცემით გვეპყრობოდნენ, მაგრამ ჩვენი ვალია, ჩვენი შვილების თვალში პატივისცემა არა მხოლოდ მამის სტატუსის, არამედ, უპირველესად, საკუთარი სწორი და ღირსეული ცხოვრებისეული მაგალითების ჩვენებით მოვიპოვოთ!
გიორგი შარაშიძე
მთავარი რედაქტორი
editor@entrepreneur.ge
